فرشة عيش أمام مخبز.. وصاحبها يحسّن دخله بـ«الأكياس» (فيتشر)

فى 2007 خرج على المعاش، بعدما كان عاملاً فى شركة للأمن الغذائى، لتمر عليه أيام قليلة قبل أن يتسرب إليه الملل من الجلوس فى المنزل، فقرر النزول إلى العمل، من خلال فرشة صغيرة يبيع عليها الخبز على بعد خطوات من منزله، لكن الطريف فى الأمر أن الفرشة فى مواجهة مخبز، ليجد الرجل نفسه مضطراً لحيلة صغيرة يتكسب منها فأصبح يبيع الأكياس لزبائن الفرن. يجلس محمد شحاتة، ذو الـ64 عاماً على بعد خطوات من منزله، على كرسى خشبى وضعه خلف فرشة صغيرة وضع عليها بعض الأكياس البلاستيكية، التى يشتريها بشكل دورى، ومن أمامه كان مخبز الصعايدة، يبيع الخبز للزبائن، الذين قد يصلون إلى المكان دون أن يكون بيدهم حقيبة أو قفص لوضع الخبز فوقه، وفى تلك الحالة يتجهون للرجل الذى يحصل على جنيه مقابل كل كيس بلاستيكى يبيعه: «ماكانش ينفع أقعد فى البيت من غير شغل، فعملت فرشة أبيع عليها عيش محمص، ولما لاحظت إن فيه ناس بتعطل فى موضوع الشنط ده، اشتريت وبقيت أبيع»، يحكى الرجل الذى يحصل على 793 جنيهاً شهرياً، هى معاشه الذى يتقاضاه، واستطاع تحسين دخله من خلال تلك الفرشة: «ناس بتيجى تهزر وتقول لى انت جاى تبيع الميّه فى حارة السقايين، عشان خاطر قدامى فرنة يعنى، بس أنا ببيع محمص عشان أختلف عن الفرن». «محمد»: ببيعه للناس علشان تشيل فيه العيش من 8 صباحاً وحتى 4 عصراً، يجلس الرجل كل يوم، ويستفيد من مدخل منزل تركه له صاحبه ليضع فيه بضاعته، من الخبز والأكياس، وفى آخر اليوم يعود إلى منزله بما تبقى معه من بضاعة: «عندى 3 عيال اتجوزوا الحمد لله، ولسه واحدة، وشوية العيش والشنط دول اللى عايش عليهم، عشان المعاش ده ميكفيش حاجة». يشترى الرجل كيلو الأكياس البلاستيكية بـ35 جنيهاً، بعدما كان سعره 15، ويبيع الواحد منها بجنيه: «الكيلو فيه حوالى 55 شنطة، الناس تطلع من الفرن وتاخد منى كيس تعبّى فيه حاجتها وتروح، بدل ما تقعد تدور تشيله على إيه، ولو أنا بعت عيش من عندى بديهم الكيس ببلاش».

مصدر الخبر