رسومات بالألوان الفسفورية لتوفير الطاقة ليلاً: بتنور فى الضلمة (فيتشر)

رسومات تضىء فى الظلام، فكرة جديدة وجد فيها البعض طريقة لتوفير مصدر إضاءة بسيط ليلاً، نفذها مجموعة من المهندسين وطلاب الفنون الجميلة، وهى ملونة بألوان فسفورية تراها فى النهار بطريقة وفى الليل بطريقة أخرى. محمد عبدالوهاب، مهندس وأحد منفذى الفكرة، خطرت له الفكرة عندما أحضرت إحدى زميلاته فى الفريق بعض الألوان المضيئة التى لفتت انتباهه: «الألوان بتنور ففكرنا إننا نستغلها ونعمل بيها لوحات وديكورات تنور فى البيت». 4 طرق مختلفة من الرسم يستخدمها الفريق، وتجلب عدة إضاءات مختلفة: «فيه ألوان بتنور بالشحن وفيه ألوان تانية بتكون غير ظاهرة ومش بتبان غير فى الظلام»، وبحسب «محمد» فإن هناك بعض الرسومات تظهر بشكل فى إضاءة النهار وبشكل مختلف فى الظلام: «الناس بقت تطلب الرسومات دى فى غرف الأطفال عشان توفر لهم إضاءات لطيفة مش مزعجة ويقدروا يناموا، خصوصاً الأطفال اللى بيخافوا من الضلمة». حجم ومساحة الرسمة هو المحدد الأساسى للمدة الزمنية الكافية للانتهاء منها: «الألوان دى يمكن استغلالها للرسم على الأرصفة، فى الشوارع هتدى منظر جمالى وكمان هتدى إضاءة بالليل حلوة جدا وهتوفر من استهلاك الكهرباء». تصل تكلفة المتر الواحد فى اللوحات المرسومة بالألوان الفسفورية إلى 200 جنيه: «كل ما التفاصيل بتكتر فى اللوحة تكلفة المتر فيها بتعلى.. رسومات البورتريه بيوصل تكلفة المتر لـ800 جنيه»، وبحسب قوله فإن الإقبال كبير خاصة داخل نطاق القاهرة والجيزة: «إحنا مابنشتغلش لحد الوقت الحالى فى المحافظات كل شغلنا فى القاهرة»، ويتم استيراد الألوان المستخدمة فى اللوحات من روسيا والهند وألمانيا.

مصدر الخبر